Madaxweynaha Somaliland Oo Qaabilay Wefti Ka Socday Ingiriiska

0
132

Hargaysa (Hargeisa Press): Madaxweynaha jamhuuriyadda Somaliland Muuse Biixi Cabdi, ayaa maanta qaabilay wefti balaadhan oo ka socday dawladda Ingiriiska, kaasoo booqasho hal maalina ku yimid caasimadda Hargaysa.

Weftigan ka socday dalka Ingiriiska waxaa hogaaminayay wasiirka difaaca dawladda Britain Mr. Gavin Williamson, oo ay wehelinayeen xubno kale oo masuuliyiin ah.

Sidaasina waxaa lagu sheegay war-saxaafadeedka ka soo baxay xafiiska af-hayeenka madaxweynaha jamhuuriyadda Somaliland oo nuqul ka mida uu soo gaadhay xafiiska wararka ee shebekadda Hargeisa Press.

War-saxaafadeedkaasina waxa uu u dhignaa sidan:

“Madaxweynaha Jamhuuriyadda Somaliland Oo Xafiiskiisa Ku Qaabiley Wasiirka Difaaca Dawladda Ingiriiska Oo Maanta Booqasho Ku Yimid Dalka.

Madaxweynaha Jamhuuriyadda Somaliland, Mudane Muuse Biixi Cabdi ayaa maanta Xafiiskiisa ku qaabiley Wasiirka Difaaca ee Dalka Ingiriiska, Mudane Gavin Williamson oo booqasho rasmi ah ku yimid Jamhuuriyadda Somaliland.

Kulankan oo ahaa mid saacado qaatay ayaa lagaga wada hadlay sidii loo xoojin lahaa xidhiidhka soo jireenka ah ee ka dhexeeya Jamhuuriyadda Somaliland iyo Boqortooyada Ingiriiska oo ay Somaliland xoriyadeeda ka qaadatay 1960-kii.

Iyadoo safarka wasiirkuna uu yahay safarkii u horeeyey ee masuul haya xilka wasiirka difaacu uu ku yimaado Jamhuuriyadda Somaliland.

Waxaanu kulankaasi ku soo dhammaaday is-afgarad buuxa iyo in la sii xoojiyo cilaaqaadka labada dal ee Ingiriiska iyo Somaliland, lana dar-dar geliyo horumarinta arrimaha iskaashi ee ka dhexeeya labada waddan.

Waxaana Madaxweynaha kulankan ku wehelinaayey Wasiirrada Arrimaha Dibedda iyo iskaashiga caalamiga ah, gashaandhigga iyo Safiirka Jamhuuriyadda Somaliland u qaabilsan Dalka Ingiriiska”.

ALLAA MAHAD LEH

Maxamuud Warsame Jaamac

Af-hayeenka Madaxweynaha JSL.

 

LEAVE A REPLY