Hargeysa, (HargeisaPress) —Iskaashatadda Basaska ka dhex shaqeeya magaaladda Hargaysa, maamulka dawladda hoose ee Hargaysa iyo badhasaabka gobolka Maroodijeex oo isku dhinac ah ayaa si wada jir ah go’aan uga gaadhay in aan la kordhin qiimaha lagu raaco basaska.
Qiimaha lagu raaco basaska ka dhex shaqeeya gudaha caasimadda Hargaysa ayaa markii hore lagu raaci jiray 1500 shillinka Somaliland ah, halka labadii maalmood ee la soo dhaafay basaska ka shaqeeya istaamadda qaarkood ay ka dhigeen 2000 shillin.
Kulan saddex geesood ahaa oo lagaga arrinsanayay sidii kor u kaca ku yimid qiimaha lacagta lagu raaco basaska oo ka dhacay xarunta dawladda hoose ee Hargaysa ayaa gebagebadiisii laga cadeeyay in xal laga gaadhay.
Waxaanay masuuliyiintii kulankaasi yeeshay warbaahinta u sheegeen in ay isla qaateen in aan la kordhin qiimihii hore ee ay bulshadu ku raaci jireen basaska, iyadoo isla goobtaasi ay heshiis ku kala saeexdeen maayarka caasimadda, badhasaabka gobolka iyo guddoomiyaha iskaashatadda basaska.
Maayarka caasimadda Hargaysa C/raxmaan Soltelco, ayaa sheegay in dhibaatadii iyo hagar daamadii shacabka ka soo gaadhay shaqo joojintii ay basasku sameeyeen ahayd wax aan loo dul qaadan karir, isagoo balan qaaday in aanay mar danbe dhici doonin.
Waxaanu yidhi “Shacbigeena oo ay haysato dhibaato badani, maanta hagar-daamadii ku dhacday waxay ahayd wax aan loo dul-qaadan Karin, in ay mar danbe dhacdana aqbali mayno.
Intiina halkan fadhidaa waxaad tihiin masuuliyiinta iskaashatadda basleyaasha, kuwa idinka maqan iyo kuwiina joogaba, go’aankaa aynu qaadanay ee ah in lagu shaqeeyo qiimihii hore ee ahaa 1500 9kun iyo shan boqol oo shillin), ayaa lagu shaqaynayaa”.
Sidoo kale guddoomiyaha gudiga iskaashatadda Basaska Hargaysa C/raxiin Maxamed Yuusuf, ayaa cadeeyay in masuuliyiinta ururka iskaashatadda basleyaasha Hargaysa, maayarka caasimadda iyo badhasaabka gobolka Maroodijeex ay isla af-garteen in aan la kordhin qiimaha lagu raaco basaska.
“Waxaan halkan ka cadaynaa in khilaafkii maanta ka dhacay labadda istaan uu si khaldan u dhacay, isla markaana aanu dhamaynay, iyadoo berina lagu shaqayn doonno qiimihii hore ee ahaa 1500-tii boqol” guddoomiyaha gudiga iskaashatadda Basaska Hargaysa C/raxiin Maxamed Yuusuf.
Badhasaabka gobolka Maroodijeex C/laahi Jibriil Gaax-nuug (buraale), ayaa isna halkaasi ka sheegay in ay ka damqanayaan dhibaatadii shacabka ka soo gaadhay shaqo joojintii ay sameeyeen derawaliinta basaska qaar ka mid ah ka shaqeeya istaamadda magaaladda Hargaysa, isagoo xusay in xukuumadu ay tallaabo ka qaaday derawaliintii shaqo joojinta sameeyay.
Waxaanu yidhi “Wax aad iyo aad looga naxo ayay ahayd arrintii maanta dhacday, waanan ka xunahay, waanan ka wadda damqanaynaa, anagoo u damqanayna shackayaga. Dawladu amniga iyo wixii dhibaato ah ee shacabka lagula kaco iyadoo heegan u ah, una diyaar ah. Derawaliintii istaamadda falkaasi ku kacayna way xidhna yihiin, wixii tallaabo noocaas ah qaadana sidaas ayaa loo xidhi doonaa”.
Geesta kale maalmihii la soo dhaafay waxa jirtay in arrintaasi uu ka taagnaa khilaaf u dhexeeyay dawladda hoose iyo iskaashatadda basaska, iyadoo qaar ka mid ah basaska ka shaqeeya istaamadda Hargaysa ay shaqo joojin sameeyaan, taasi oo xanibaad ku keentay bulshadda.
Derawaliinta gaadiidka dadweynaha ayaa cabashadoodda ku saleeyay sixir bararka ku dhacay maciishadda, iyagoo ku dooday in lacagta ka soo gasha shaqadda aanay daboolaynin qudral daruuriga qoysaskooda.
Sidaas darteed-na ay lagama maarmaan ku noqotay in ay kordhiyaan qiimaha lagu raaco basaska oo markii hore ahayd 1500 shillinka Somaliland ah, halka ay hadda ka dhigeen 2000 shillin.
HargeisaPress News Desk — Hargeysa